大埔燒烤場同信士多食評：BBQ抵食任飲！可泊車但要Book位（附電話及價錢表）

大埔燒烤場同信士多好唔好？抵唔抵燒？秋冬天氣，唔少人會約朋友去BBQ，以大埔BBQ燒烤場嚟講，大埔同信士多及大埔大尾篤麥師傅最具人氣，當中又以大埔同信士多愈嚟愈紅，甚至係閒時晚黑入去，都要提早幾日Book位。點解？就由小編哩位大埔老街坊同大家講吓。

大埔同信士多BBQ場收費表及訂位泊車資料

閒日價	任食3小時，成人160元，小童110元。
假期／紅日價	任食3小時，成人180元，小童120元。
開爐費	50元 (5人一爐免收)
停車場泊車費	1.平日首兩小時，每半小時5元。兩小時後每半小時7.5元； 2.周六及假期首兩小時，每半小時20元；兩小時後每半小時30元； 3.每晚8點至翌日朝早8點，無論平日或周六、紅日，一律每小時5元。
營業時間	12:00pm至12:00am
電話	94677131／65960830
燒烤場網址	http://www.yl.hk/tssbbq/
備注	1.價格或隨時改動，所有價錢均以現場即時收費為準。 2.出發前宜問清楚同信士多休息日期。

大埔燒烤場同信士多好唔好？啤酒任飲

小編之所以去大埔大尾篤同信士多BBQ，係貪佢有任飲同食物款式多。你知啦，一大班人燒烤，少不免幾罐落肚。如果去其他大埔BBQ燒烤場，一支啤酒都十幾蚊，一晚飲幾支，洗費都唔少。而同信有罐裝獅威同青島任飲，經濟實惠。除咗啤酒，佢仲有可口可樂、支裝水、楊協成系列飲品同其他有趣嘅內地飲品任飲。如果想飲道地或者津路，就要喺同信入面嘅小賣部俾錢買啦。

大埔bbq 同信士多食物多有茄子有菠蘿

去大埔燒烤，食物種類多好重要，同信就豬、牛、羊、雞樣樣齊。只係講雞，就有雞扒、雞軟骨、雞皮、麻辣雞翼、一般雞翼同黑椒雞翼。至於丸類，就有牛丸、龍蝦丸、墨魚丸、龍蝦丸及魚蛋。當然，佢仲有啲神秘丸子啦！扒方面，都係指定幾味，但菜就值得講，佢有大大條茄子，方便即場整蒜香茄子或者係孜然粉燒茄子。茄子之外，仲有菠蘿同韭（音：九）菜。韭菜識燒，又係一道好食到飛天嘅美食。